LAOAG CITY – Inpakaammo ni Police Lieutenant Colonel Mar Louise Bundoc ti Chief of Police ti Philippine National Police ditoy Siudad ti Laoag nga agsublin dagiti pulis a nag-avail ti Christmas Break inton Disiembre 27.
Segun kenkuana, amin a pulis a nagbakasion kabayatan ti Christmas Break ket rumbeng nga agsublida iti serbisio iti nasao nga aldaw.
Inbatadna nga apaman a makasublin iti serbisio dagitoy ket sumublat to metten dagiti pulis a nag-avail iti New Year’s Break a mangrugi inton Disiembre 28.
No pay kasta, inlawlawagna kas dagiti nagbakasion iti Christmas Break ket on call wenno matawagan latta dagiti pulis amangan laeng no adda ti dakkel a mapasamak wenno operasionda.
Kunana a dagiti naka-duty a pulis ket isu ti mai-deploy kadagiti kangrunaan a lugar ken establishmento a pagturungan dagiti tattao iti daytoy nga holiday season.
Kabayatanna, kuna ni Police Lieutenant Colonel Bundoc iti laksid a naipatungpal ti 50% scheme ti operasionda ket saan a nagbalin a lapped ken parikot daytoy para kadakuada iti pananggun-od ti balligi kalpasan a generally peaceful ditoy Siudad ti Laoag kabayatan ti pannakaisayangkat ti Misa de Gallo kasta metten ti panangsabat iti daytoy kaaldawan ti paskua.
