LAOAG CITY – Bumaba iti Patrolman ti ranggo ni ti pulis a ni Ronald Pastor, kameng ti 2nd Provincial Mobile Force Company manipud iti Police Corporal.
Daytoy ket kalpasan a naibaban ti desisyon ni Regional Director Police Brigadier General Emmanuel Peralta mainaig iti kaso administratibo a naipila kontra kenni Pastor.
Segun iti Internal Affairs Office iti PNP-Regional Office 1, ti desisyon ni Peralta a “one rank demotion” ket kalpasan ti naiyuswat nga imbestigasyon.
Namunganay ti kaso ni Pastor a grave misconduct ken conduct unbecoming of a police officer gapo iti panagpappaputok na ti paltog iti oras ti olas-onse iti rabii ti Pebrero 25, 2021 bayat nga adda iti pagtaengan na iti Barangay 6, Sta. Rita iti ili ti Paoay.
Maipalagip nga ado a kapsula ti bala ti M16 armalite ken kalibre 45 a paltog pakairamanan ti magazine ti narekobre dagiti kameng ti PNP-Paoay bayat ti panagresponde da.
Naamoan a napilaan pay ti kaso kriminal ti Pastor ngem nadismiss daytoy.
