LAOAG CITY – Narigat a paggeddanen ti panagbalin kas maysa a pulis ken panagrebyu para iti bar examination.
Daytoy ti inpakaammo ni Police Staff Sergeant wenno Atty. Darwin Andres kalpasan a nakapasa isuna iti 2024 Bar Examination.
Segun kenkuana, nabayagen nga arapaapna ti agbalin nga abugado ngem saan a dagus a simrek iti Law School gapu ta awan pay ti naan-anay nga urnongna a mangsuporta iti panagbasana iti abogasia.
Nupay kasta, kunana nga apaman a nakastrek iti trabaho kas maysa a pulis ken nakaurnong daytoyen ket inkarigatanna a makaadal iti abogasia.
Inbatadna a dakkel a sakripisio ti inaramidna kabayatan ti panagrebyuna gapu ta kasapulanna a gudduaen ti oras iti panagtrabaho iti Regional Mobile Force Batallion Company ken ti panagrebyuna iti las-ud ti innem a bulan.
Kunana nga adda pay dagiti gundaway nga agrebrebyu isuna kabayatan a naka-duty daytoy.
Naammoan a daytoy ti umuna a gundaway a nangala ti bar examination ni Atty. Andres a dagus met daytoy a nakapasa.
Innayonna nga adda ti kasinsinna a nakapasa met iti Bar Examination iti napalabas a tawen.
Iti agdama ket plano ni Atty. Andres nga agtalinaed pay laeng iti Philippine National Police ngem nakalukat isuna kadagiti baro nga oportunidad.
Kabayatanna, ni Atty. Andres ket maysa kadagiti 3,962 nga examiners a nakapasa iti kalepleppas a 2024 Bar Examination.
