LAOAG CITY – Mabalin a sumango iti kaso administratibo ti pulis a nangasot ti paltog na kontra iti pada na a motorista kalpasan nga adda ti saanda a nagkinnaawatan iti kalsada iti ciudad ti Maynila.
Inbilin metten ni Philippine National Police (PNP) Chief PGen. Rommel Francisco Marbil ti imbestigasyon seknan iti nasao nga insidente.
Ti insidente ket napasamak iti Sta. Ana, Maynila idi Mayo 12, 2025.
Iti video a nagwaras iti online ket makita a nagbinnara dagiti dua a motorcycle rider ken maysa ditoy ket ti nasao a pulis.
Mabuya iti video a kabayatan ti panagriri dagiti dua ket inasot ti pulis ti paltogna.
Segun ken ni Marbil, ti nasao a pulis ket naiyakaren iti District Personnel Holding and Accounting Section ti Manila Police District.
Insuko metten ti pulis ti paltog na bayat a maiyur-uray ti resulta ti maiyus-uswat nga imbestigasyon.
Inpetteng ni Marbil a saanda a kunsintiren ti kastoy nga ugali dagiti kameng ti Philippine National Police.
