LAOAG CITY – Tiniliw dagiti kameng ti Philippine National Police (PNP) iti ciudad ti Batac babaen ti bileg ti warrant of arrest ti maysa met laeng a kameng ti pulisya gapu iti kaso na nga Acts of Lasciviousness iti ili ti Sarrat.
Ti natiliw a pulis ket agtawen ti 40, residente iti Brgy. San Agustin iti ili ti Sarrat ken addaan ti ranggo a Police Staff Sergeant.
Naamoan a ti nasao a warrant of arrest ket napetsaan ti Disyembre 17 ita a tawen ken inparuk-at daytoy ni Hon. Maribel Mariano Ariola, Assisting Judge iti Regional Trial Court First Judicial Branch 17 iti ciudad ti Batac.
Nairekomendar ti 200 a ribo a pisos a piyansa ti saanen a nainaganan a pulis para iti temporaryo a pannakawaya-waya na.
Iti agdama, nagtalinaed ti nasao a pulis iti kustodyar ti PNP iti ciudad ti Batac.
Kabayatanna, ginandat ti news team ti Bombo Radyo Laoag ti mangala ti background mainaig iti kaso ti nasao a pulis ngem nagkedked dagiti imbestigador a nangipaay ti aniaman a detalye.
