LAOAG CITY – Inrakurak ni PBGen Rodolfo Azurin Jr., ti PNP Regional Director ti PRO 1 a saan a patunuynuyan dagiti pulis nga aglablabsing iti linteg.
Iti exclusive nga interview ti Bombo Radyo Laoag kenni Azurin, inbatad na a nabalakadan dagiti pulis nga awan ti exempted iti aniaman a pagalagadan.
Segun kenkuana, dua laeng ti misyon ti PNP, daytoy ket ti panangisakit kadagiti kapulisan ken kakailian ken ti pannakapatalinaed ti linak, urnos ken talna.
Innayon na a masapul nga adda iti kaadda ti disiplina ken panangsumurot iti paglintegan ket adda ti pagdur-asan ti pagilian nangruna ditoy Ilocos Region.
Kabayatanna, inbatad na nga apaman a maipatungpalen ti new normal ket makikoordinar da kadagiti opisyal ti barangay seknan iti pannakaipatungpal ti peace and order tapno mapagtalinaed iti nababa a crime rate ditoy rehiyon.
