LAOAG CITY – Mairekreklamo ti maysa a pulis iti Philippine National Police – Bacarra gapu iti maipagarup a panagpangtana iti biag ti sumagmamano a residente.
Segun ken ni Father Arvin Mangrubang, kabayatan ti pasken ken pakanta ti pamiliada iti tengnga ti rabii ket adda ti dua a pulis ti nagresponde iti pagtaenganda.
Gapu iti daytoy, kunana a dimmawatda ti panagpadispensar ken nagkiddaw a palpasenda laengen ti maysa a kanta ngem ditoy metten a maipagarup a nangrugi ni Police Master Sergeant Rely R. Vea Jr. a nagprobokar ken nagpangta.
Inpeksa ni Mangrubang ti sakit ti nakemna iti nasao a pulis gapu ta imbes nga isuda ti pagwadan ti linak, urnos ken talna ngem dagitoy met ti agaramid ti riribok.
Inlawlawagna a masapul nga ipatungpal dagiti kameng ti kapulisan ti proper protocol no sadinno nga agkatokda kadagiti pagtaengan tapno saanda nga agaserserrek, repestaren dagiti umili ken makikoordinarda iti barangay tanod wenno kagawad iti panagrespondeda.
Mainaig iti daytoy, inpakaammo ni Mangrubang a nagsubli ti nasao a pulis iti kabigatanna iti pagtaenganda a saan daytoy a nakauniporme nga agarup maysa nga oras a nagur-uray tapno dumawat ti pammakawan.
Nupay kasta, inpettengna a saanna a sinango ti maseknan a pulis gapu ta kalikagumna nga agsarita dagitoy iti sangoanan dagiti otoridad.
Innayonna a kalikagumna a makikoordinar iti Internal Affairs Service (IAS) gapu ta planona a mangipila ti reklamo kontra iti nasao a pulis.
Kabayatanna, basar iti video a naipatulod ditoy Bombo Radyo Laoag, mangngeg ti maipagarup a panagpangta ni Patrolman Vea iti biag kadagiti sumagmamano a residente, panagkaritna ken panagkasa ti paltog.
