LAOAG CITY – Maawaten dagiti pulis ti Health Maintenance Organization cards dagitoy inton Hulio.
Daytoy ti napintas a damag ni Philippine National Police Chief Gen Rommel Francisco Marbil kagiddan ti panangidaulona iti pannakairubuat ti PNP Family Day iti Camp Crame.
Inbatad ni Marbil a ti tunggal Health Maintenance Organization card ket addaan ti 40 a ribu a pisos a mausar dagiti pulis nangruna no adda ti medical emergencies.
Nupay kasta, saan nga inrakurak ti opisial ti nagan ti Health Maintenance Organization.
Kunana nga ita laeng a naaddaan ti bukud nga health card dagiti pulis a mangipaay kadakuada ti panangipasigurado a makaawatda ti madagdagus a sebisio medikal nupay awan ti kuartada.
Kabayatanna, nupay adda ti Health Service dagiti 232 a ribu a pulis, kuna ni Marbil nga awan ti ospital ti police force kadagiti amin a probinsia a mabalin a pagturungan dagiti pulis no bilang adda ti mapasamak nga emergency.
