LAOAG CITY – Inkalintegan ni SPO2 Eric Bumagat, ti mangidadaulo iti PNP Traffic Division ditoy ciudad ti Laoag ti naipost a ladawan ti maysa a pulis a nakamotorsiklo a saan a naka-helmet iti social media kangrunaan na iti facebook.
Inlawlawag na nga adda ti rinespondean da a desgrasya iti paset ti Rizal Street ditoy ciudad ti Laoag.
Inbatad na a dagiti involved a lugan ken motorsiklo ket inkabil da iti PNP Traffic Division.
Kuna na nga iti dayta a gundaway ket awan ti helmet nga usaren ti saannan nga innaganan a pulis gapu ta naburak ti helmet ti biktima isut gapu na nga insaruno na lattan iti patrol car da.
Innayon na a saan nga ammo dagiti tattao a ti inturong a motorsiklo ti nasao a pulis ket involved ti desgrasya.
Mainaig ti daytoy, inadmitir ni Bumagat a saan koma a maiparbeng ti kastoy gapu ta kababain kadagiti tattao isut gapu nga inpasingked na a masapol nga agusar danton a kanayun ti helmet.
