LAOAG CITY – Inlawlawag ni Provincial Director Police Col. Christoper Abrahano a sakbay a nagawid ditoy probinsya ti pulis manipod iti Camp Crame a maibagbaga a Person Under Investigation (PUI) ti covid-19 ket tinawagan na daytoy.
Daytoy ket gapu ta agdudua ti nasao a pulis iti possible a saan a panangawat kenkuana ti pagturungan na nga ili ditoy probinsya.
Inbatad na nga adda ti pammilin ni Presidente Rodrigo Duterte a masapol a siguradwen da a maaywanan ken mapagtalinaed da a natalged dagiti pulis ken dagiti frontliners.
Inpasingked na nga iti papanda panangsukon ti nasao a pulis iti border iti ili ti Badoc ket sinurot da amin a protocols, karaman ditoy ti panangideretso da iti Mariano Marcos Memorial Hospital and Medical Center iti ciudad ti Batac para iti idadalan na ti medical assessment uray awan ti sintomas na ti covid-19.
Inpakaammo ni Abrahano nga iti pannakisarita na iti doktor ket inbaga na nga awan ti nakita na a sintomas ti virus iti nasao a pulis.
Manipod iti ospital iti ciudad ti Batac ket inpan da ti pulis iti Camp Valentine S Juan partikular iti quarantine area da.
Innayon na nga adda ti medical personnel da a mangkitkita ti salun-at dagiti pulis iti kampo.
Immunan nga inlawlawag ni Abrahano a nagawid ti pulis ditoy probinsya kalpasan a napnon dagiti barracks da kadagiti Person Under Monitoring (PUM) ket marigatanen iti accomodation iti Camp Crame.
Segun ti provincial director, amin a frontliners kas ti nasao a pulis ket maibilang a PUM.
Saan met a maadmitir ni Abrahano a PUI ti nasao a pulis ngem ketdi maibilang laeng a PUM ti maseknan.
Inpasigurado met ni Abrahano a masursurot amin dagiti protocols iti pannakai-quarantine ti nasao a pulis iti quarantine area iti Ilocos Norte Police Provincial Office (INPPO).
Kabayatanna, inpetteng ni Abrahano a saan amin a PUM ken PUI ket kasapulan a maiconfine iti ospital gapu ta adda met dagiti maibilang laeng a mild cases.
Inpalagip na a ti PUI ket adda ti sintomas na ti covid-19 idinto a dagiti awan ti sintomas na ngem naggapo iti lugar nga addaan ti positibo ti virus ket maibilang a PUM.
