LAOAG CITY – Saan pay a naestablisar ti Philippine National Police (PNP) idiay ili ti Solsona no siasinno dagiti suspek iti pannakapalto-paltog ti naglugan ni Sang. Bayan Member Jovencio Pascua idiay Barangay Manalpac iti nasao nga ili.
Daytoy ti inbatad ni Police Senior Inspector Chris Anthony Sorsano, ti chief of police ti PNP-Solsona.
Segun kenn Sorsano, adda dagiti residente iti nasao a barangay ti naalaan da ti palawag mainaig iti pasamak ngem saan da a nairupaan dagiti suspek.
Karaman kadagiti kitkitaen dagiti otoridad a motibo ti pammaltog ket mainaig iti pulitika.
Immunan nga inbatad ni Pascua nga awan ti naaw-awat na a pangta iti biag sakbay ti pasamak.
Maipalagip a napalto-paltogan ti naglugan ni Pascua ken ti driver na a ni Mr. Sydney Villora idi agawid da ngem saan da a natamaan.
Narekobre dagiti otoridad ti dua a magazine ken ti maysa kadagitoy ket addaan ti 14 a bala, sabali pay ti naiwarang a 34 a bala ti M16, ken 11 nga empty shells, kasta met ti sako a nangikabilan dagiti suspek iti paltog.
Agtultuloy met ti naun-uneg nga imbestigasyon dagiti otoridad kas pammilin ni Provincial Director Police Senior Supt. Cesar Pasiwen.
