LAOAG CITY – Binabalaw ni Davao City First District Representative Paolo “Pulong” Duterte ti mapapati a pammilin ti maysa nga ahensia ti gobierno a mangimbestigar kadagiti sanikua da.
Iti statement na iti Facebook post, kinuna ni Duterte a segun kadagiti impormer na, maysa nga ahensia ti gobierno a kunana a sangsanguenna dagiti isyu iti leadership integrity ti nangibilin iti Investigation Division for Public Corruption a mangisayangkat iti imbestigasion kontra kadagiti sanikua da.
Saan a dinakamat ni Duterte ti nagan ti ahensia wenno nangipaay iti kanayonan a detalye maipapan iti mapapati nga imbestigasion.
Inpetteng ni Duterte a no adda imbestigasyon wenno case build-up kontra kadakuada, maibasar koma iti ebidensia ken due process, ken saan a iti politika.
Kinaritna pay dagiti mangisayangkat iti imbestigasion a kitaenda dagiti personalidad nga adda pakainaiganna iti kontrobersia mainaig kadagiti proyekto ti flood control project, pakairamanan dagiti opisial a kunana a rumbeng met a sungsungbatanda.
Innayon pay ni Duterte a saanda a mabuteng iti mapapati a pangta, panangriribuk, wenno panangidadanes iti politika, ken inpettengna a no adda man ti sungsungbatan dagiti kontrobersia, kinunana a rumbeng a maimbestigaran ken sungbatan amin dagiti nairaman.
