LAOAG CITY – Inpakaammo ni Ms. Rhona Ysabel Daoang, Officer-In-Charge ti Communications and Media Office ti kapitolyo probinsyal nga adda ti proseso a sursuroten ti Department of Health ditoy probinsya kasanguanan a maipost iti facebook page ti gobyerno probinsyal dagiti pumusay a pasiente gapo iti COVID-19.
Reaksyon na daytoy kalpasan nga adda dagiti gundaway a nangato ti bilang dagiti mairekord a pimmusay a nagpositibo ti covid-19.
Inlawlawag na a ti proseso a masursurot ket masapol nga adda ti Death Certificate ti pumusay ken mailanad a COVID-19 ti nakatayan na tapno mairaman iti listaan a maipublikar.
Maipalagip nga iti kallabes ket adda dagiti nangkwestyunar gapu ta saan nga agpapada ti bilang dagiti mairepreport a pimmusay kadagiti COVID-19 bulletin dagiti nagduduma nga ili ken ciudad kasta met iti gobyerno probinsyal.
Kabayatanna, inpasingked ni Daoang nga ikarkarigatan ti gobyerno probinsyal a maipababa ti kaso ti COVID-19 ditoy probinsya kangrunaan na dagiti pumusay.
Malaksid iti daytoy, inbaga na nga aramiden da amin a kabaelan da tapno ad-adda pay a mapadur-as ti maipatpatungpal nga health protocols ditoy probinsya.
