LAOAG CITY – Dandanin nga agreggaay ti pundasion ti maysa a kanal iti Brgy. 41, Balacad ditoy siudad ti Laoag.
Basar iti pannakisarsarita ti News Team ti Bombo Radyo Laoag kadagiti construction workers a manarimaan ti pannakatarimaanna ti naperdi a paset ti kanal nga agarup 10 a kilometro ti kaatiddugna.
Segun kadakuada, nadadael ti nasao a kanal gapu iti iduduprak ti Super Typhoon Carina ken abagat.
Gapu iti daytoy, posible nga agreggaay ti pundasion ti kanal no bilang adda dagiti napigsa a tudo a mapasaran ditoy probinsia.
Mainaig iti daytoy, inbatad ni Brgy. Chairman Menor iti nasao a barangay a saanna nga ammo ti nadakamat a proyekto gapu ta nadanonnna laeng daytoy iti napalabas nga administrasion.
Kabayatanna, naammoan a ti nasao a proyekto ket ipatpatungpal ti Department of Public Works and Highways – 1st District Engineering Office.
