LAOAG CITY – Inpakaammo ni Engr. Luciano Domingo, Provincial Engineer ditoy probinsia a manamnama ti pannakaiparuk-at ti 700 a milyon a pisos para iti pannakaitultuloy ti pannakaipasdek iti Central Terminal Hub ditoy siudad ti Laoag.
Segun kenkuana, manamnama nga inton bulan ti Agosto wenno Setiembre a mairuar ti nailatang a pundo.
Inbatadna nga agtultuloy iti panagtrabahoda iti pannakaipasdek iti Central Terminal Hub ti probinsia.
Kunana nga ita a tawen wenno inton bulan ti Disiembre ket addanto ti makitan a pagbaliwan ti pasdek.
Malaksid iti daytoy, inlawlawagna nga iti phase 1 nga addan iti 380 a milyon a pisos ket malmalpasen iti slope protection ken pannakagaburna daytoy.
Innayonna nga iti pannaka-main building ti Central Terminal Hub ket manarimaan metten ti pannakaipasdekna.
Kabayatanna, naammoan nga adda ti 2.1 nga ektaria ti kalawa iti maar-aramid a Central Terminal Hub ken ti pannakaipasdek daytoy ket agserbi kas maysa a solusion iti saan a naurnos a terminal ditoy probinsia.
