LAOAG CITY – Inlungalong ni Senate Committee on Basic Education Chairman Sherwin Gatchalian nga ipangato ti pundo iti pannakaipasdek kadagiti nayon a classroom.
Daytoy ti inpasigurado ni Gatchalian kagiddan ti panangrugin ti klase dagiti estudiante.
Ita nga school year ket mapattapatta a dumanon iti 27 a milyon nga enrollees manipud iti preschool agingga iti senior high school.
Inbatad ni Gatchalian, tutukanda ti budget hearing a manayonan ti pundo para iti pannakaipatakder dagiti classroom nangruna ket umad-adu ti bilang dagiti agen-enroll iti kada tawen.
Siguradoen pay ti agpanpanday linteg nga iti kanito a maipaayan ti pundo ket nasken a napaspas ti absorptive capacity wenno nasken nga alisto met ti pannakaipasdek dagiti classroom a masansan nga agpaut ti dua agingga iti tallo a tawen sakbay a malpas.
