LAOAG CITY – Inaprobaran ti Sangguniang Panlalawigan ti pundo para iti Ilocos Norte Sports Institute and Research wenno INSPIRE.
Segun ken ni Atty. Franklin Respicio, Chairman ti Committee on Laws ti Sangguniang Panlalawigan, daytoy ket babaen iti pannakaipasa ti resolusion a mangsuporta iti House Bill No. 6412 a maysa a linteg para iti pannakaipasdek ti Ilocos Norte Sports Institute and Research ditoy probinsia.
Inbatadna a daytoy ti mangitandudo iti Physical Education ken mangpaiget kadagiti programa ti isports, mangidaulo iti kompetision iti ammature sports babaen ti panagsanay para kadagiti internasional a kompetision.
Inlawlawagna a ti gobierno probinsial ti Ilocos Norte ket gagemna a suportaran dagiti gannuat a mangitandudo iti salun-at, edukasion ken panagdur-as ti komunidad babaen ti isports ken bigbigenna ti potensial nga agbalin nga institusion ti isports iti nasao a rehion.
Kunana a daytoy ket mangpaiget ti sports excellence ken turismo no sadinno daytoy ti pammaneknek ti panagballigi dagiti napateg nga events kas iti National Basketball Training, North Luzon Regional Championship.
Mainaig iti daytoy, ti nasao a resolusion ket mangipaay ti competitive stage para kadagiti atleta ken mangitag-ay ti status kas premier sports ti probinsia.
Innayon ni Atty. Respicio a ti probinsia ti Ilocos Norte ket imenmentenarna dagiti pasilidad ti isports a mangallukoy kadagiti propesional nga isports teams ditoy probinsia.
