LAOAG CITY – Kinissayan ti Department of Public Works and Highways (DPWH) ti agarup 30% ti proposed budget-da para inton 2026 kalpasan nga inbilin ni Presidente Ferdinand Marcos Jr. ti naiget a pannakatingiting iti daytoy.
Inbatad ni Palace Press Officer Claire Castro, manipud iti ₱881.3 bilyon, bimmaba daytoy ti ₱625.8 bilyon ti nailungalong a budget ti Department of Public Works and Highways kalpasan a naikkat dagiti amin a locally funded flood control projects nga agbalor ti ₱252 bilyon.
Kiniddaw ti Department of Public Works and Highways iti Kongreso nga iyakar iti nasao a pundo kadagiti programa a makatulong iti agrikultura, edukasion, salun-at, pabahay, panangipasdek, social welfare ken information technology.
Kagiddan iti daytoy, inrakurak ti Palasyo a naipa-freeze ti 135 a bank accounts ken 27 nga insurance policies dagiti sumagmamano a personalidad a karaman iti maanomalya a flood control projects idiay Bulacan.
