LAOAG CITY – Inpakaammo ni Mayor Markee Chua nga umabot iti 30 a milyon a pisos ti pundo a nakaipasdekan ti Bagsakan Center iti siudad ti Batac.
Segun kenkuana, nangrugi ti pannakaipatakder ti Bagsakan Center idi tawen 2023 wenno 2024 no sadinno nga adda met ti counterpart ti City Government of Batac a 30 a milyon a pisos para iti pannakapasayaat ti road networks pakairamanan dagiti silaw, kanal ken dadduma pay a kasapulan.
Inbatadna a ti nasao a Bagsakan Center ket isu ti kaunaan a naestablisar nga Ilocos Norte Agricultural Trading Center ditoy probinsia.
Inlawlawagna a ti nasao a Bagsakan Center ket saan laeng a nairanta para iti lokal a gobierno iti siudad ti Batac no diket mabalin pay nga akomodaren dagiti mannalon wenno kooperatiba manipud iti sabali nga ili wenno siudad ditoy probinsia.
Mainaig iti daytoy, inpakaammo ni Vice Mayor Albert Chua iti siudad ti Batac a mabalin nga ag-trading dagiti aggapu iti Nueva Ecija ken Ilocos Sur kadagiti ilakoda a produkto agrikultura ditoy probinsia.
Kunana a mamatida a dakkel ti maitulongna daytoy kadagiti naruay a mannalon ditoy probinsia a mailakoda dagiti produktoda kadagiti instutional buyers.
Naammoan a malaksid kadagiti taga siudad ti Batac ket adda pay dagiti taga ili ti Bacarra, Sarrat, Pasuquin ken Badoc ti naglako kadagiti produkto agrikultura dagitoy iti Bagsakan Center.
