LAOAG CITY – Maysa a pusa idiay Minnesota, U.S.A. ti opisial a pinadayawan ti Guinness World Record holder gapu iti atiddog nga ipusna nga 18.5 a pulgada.
Ti pusa a napanaganan ti Pugsley ket kukua ni Amanda Cameron ken ti pamiliana.
Segun ken ni Cameron, nabayagen a maripriparda ti naidumduma nga atiddog ti ipus ni Pugsley.
Nasdaaw pay ti beterinario iti naidumduma nga ipus ni Pugsley.
Napanunutan da Cameron nga ag-research iti Guinness World Records. Nakigtotda gapu ta at-atiddog ti ipus ni Pugsley maidasig iti agdama a record holder.
Malaksid iti panagbalinna a Guinness title holder, ni Pugsley ket nabigbig pay a managpagayam ken chill a pusa.
Gapu iti panagbalinna a naamo, masansan nga ar-aribungbunganda ni Pugsley ken aw-awaganda pay a “local celebrity” iti bukudda a lugar.
