LAOAG CITY – Maysa a taraken a pusa manipud idiay Dallas, Texas ti nakagun-od ti Guinness World Record para iti “longest jump by a cat.”
Ni Oscar, maysa a 7-year-old cat a kukua ni Theodore Shiells ket pormalen a binigbig ti Guinness World Records kalpasan a nakalagto ti 8 feet and 5 inches, ti kaadaywan a lagto a nairekord iti maysa a pusa.
Inbatad ni Shiells, nangrugi ni Oscar kadagiti simple a tricks kas ti sit, beg and fetch ngem iti dua a tawen a napalabas, nariparna ti interes ni Oscar iti panaglagto.
Dimmanon ti dua a tawen ti naiget a panagsanay ken sumurok 1,000 practice jumps sakbay a naan-anay a naala ni Oscar ti titulo.
Saan laeng a ni Oscar ti addaan ti talento kadagiti pets ni Shiells. Ti asona a ni August Ray ket adda met ti naidumduma a talentona ngem saan a ti panaglagto no di ket iti danum. Ni August Ray ket regular a makipaspaset kadagiti kompetision ti surfing dagiti aso.
