LAOAG CITY – Natiliw ti walo a tattao kalpasan a naaktuan dagiti kameng ti PNP Laoag nga agsusugal ti pusoy dos iti Brgy 27 ti nasao a siudad.
Nabigbig dagiti walo a da Joseph Patrick Dario, agtawen ti 27, Feliciano Mariano Jr, agtawen ti 35, Julius Nicolas, agtawen ti 28, Guillermo Castillo, agtawen ti 28, Bernard Tutop, agtawen ti 34, Gerald Bareng, agtawen ti 22, agpapada a residente ti Bgry 27 ditoy siudad ti Laoag karaman da, Demetrio Guillermo Jr. agtawen ti 43, kenni Crisante Marcos agtawen ti 37, agpada a residente ti Bgry 28 iti nasao a siudad.
Nakumpiskar dagiti pulis ti Dua a deck ti baraha, tallo a tugaw, 3,158 a bet money, dua a lamisaan ken sabsabali pay.
Kuna ni Castillo a naawis laeng ken nagpusta kadagiti nagsusugal ngem nakasagana nga agsungbat ti maipila a reklamo.
Inbatad pay ni Dario nga agkakaruba da ken damo na laeng ti napan iti nagsusugalan da.
Innayon na a sagsisingko laeng ti pustaan da iti pusoy dos.
Maisagsaganan ti reklamo a maipila kontra kadagiti walo iti agdama.
