LAOAG CITY – Saan nga ipalubos ni Dr. Loida Valenzuela, mangidadaulo iti Provincial Veterinary Office nga adda ti sumrek nga African Swine Fever vaccine ditoy probinsiya.
Daytoy ket kageddan iti araramiden ti Department of Agriculture ken Food and Drug Administration babaen iti Bureau of Animal and Industry a pannakaiwaras ti 500,000 doses nga African Swine Fever vaccine manipod iti AVAC Vietnam JSC.
Inpakaammona a daytoy ti nagbalin a kalikagumna tapno maliklikan tI saan a napintas nga epekto ti nasao a bakuna kadagiti taraken dagiti residente ditoy pribinsiya.
Inlawlawagna a ti bakuna manipod Vietnam ket adda pay laeng iti trial stage nga isu ti rason no apay a patienna a saan a 100% a sigurado a natalged ken makatulong a maprotehiran ti maysa a baboy iti African Swine Fever.
Innayonna pay nga adda dagiti naipadanon kenkuana nga impormasion a natay a baboy gapo iti pannakabakunada kas iti sumagmamano a baboy iti probinsiya ti Batangas.
Iti agdama, kunana a babaen iti araramidenda a panakikoordinar kadagiti City/Municipal Veterinary Office pakairamanan ti Ilocos Norte Police Provincial Office ket makitana a makaumanayen nga addang araramiden ti opisinada tapno mapagtalinaed a yellow zone wenno zero case ti probinsiya.
Kabayatana, inrakurakna a no mapaneknekan nga epekto ti bakuna ket ipalubosna a sumrek ditoy probinsiya ken maipaay kadagiti dingwen.
