LAOAG CITY – Nadangran ti maysa a lalaki a maibilang a Person With Disability wenno adda ti rangkap ti bagina iti Sitio Cavintaran, Brgy. Aguitap iti ili ti Solsona.
Segun ken ni Sangguniang Bayan Member Marvin Pascua, Chairman ti Committee on Peace and Order iti nasao nga ili, nabigbig ti biktima a ni Eric Manera, agtawen iti 37 ken residente iti nadakamat met laeng a barangay.
Inbatadna nga addan ti tallo nga aldaw ti napalabas kalpasan a nadangran ti biktima gapu iti panagsingirna ti utang iti saanen a nabigbig a suspek.
Kunana a posible a gapu ta masuron ti suspek iti mamin-adu a daras a panagsubli-subli ti biktima iti pagtaenganda tapno agsingir ti utangna ket induronna ti biktima a nakasarukud.
Gapu iti daytoy, napukawan ti balanse ti biktima agingga a naitupa ti ulona iti bato a rason metten a napukawan daytoy ti puot.
Inlawlawagna a gapu iti nakaro a sugat iti sinagaba ti biktima ket naitaray daytoy iti ospital ken na-comatose.
Mainaig iti daytoy, kuna ni Konsehal Pascua a basar iti resulta ti CT-scan ti biktima ket rumrummuar a nagdara ti utekna.
Innayonna nga inpakaammona daytoy a pasamak ken ni Police Captain Randy Damo, Hepe ti Philippine National Police iti ili ti Solsona a mangiwayat ti naun-uneg nga imbestigasion maipapan iti daytoy a banag.
Immuna iti daytoy, nagkamang ti pamilia ti biktima iti kuerpo ti pulisia tapno agpatulong ngem intudoda a mapanda iti barangay tapno ditoy a matratar.
Nupay kasta, babaen iti pannakai-post daytoy a pasamak iti online ken nai-tag ni Konsehal Pascua ket dagus a nagtignay tapno matulungan ti maseknan a biktima.
Kabayatanna, saan metten a nadakamat ti opisial no mano a gatad ti utang a singsingiren ti biktima iti suspek.
