LAOAG CITY – Inpakaamo ni PLt. Col. Rafael Lero, ti chief of police ti PNP Laoag nga agtultuloy ti panangbirok da ti maysa pay a suspek iti maipagarup a panagrames a napasamak iti maysa a pagtaengan iti Brgy. 57-Pila ditoy siudad ti Laoag.
Inbatad ni Lero a basar iti palawag ti biktima nga agtawen ti 18 ken maysa nga adda rangkap iti bagi na wenno Person With Disability (PWD), saan laeng nga innem dagiti suspek nu di ket adda pay ti maysa a kadua da.
Kuna na nga uppat dagiti menor edad ken dua dagiti adda iti umno a tawen idinto a saan pay nga ammo ti pakabigbigan ti maysa a mabirbirok a suspek.
Nu pay kasta, kinumpirmaran ni Lero a saan a residente iti Brgy. 57- Pila ti biktima.
Mainaig iti daytoy, inpakaamo ni Lero a namunganay ti insidente kalpasan a napan ti biktima iti maysa a balay tapno aginom gapu iti panangawis kenkuana ti maysa kadagiti suspek a chatmate na iti social media.
Kabayatanna, rumrumuar a maysa kadagiti suspek ket ti agtagikua ti balay a napanan ti biktima.
Iti agdama, nagtalinaed iti PNP Laoag dagiti dua a suspek idinto a naipakustodyar iti Bahay Pagasa dagiti menor de edad.
Kuna ni Lero a nakasaganan ti kaso a maipila kontra kadagiti suspek.
Immunan a kinumpirmaran ni Brgy. Chairwoman Erlinda Foster iti Brgy. 57-Pila nga adda ti maipagarup a panagrames iti barangayda ken maysa pay isuna kadagiti timmulong a nangbirok kadagiti innem a suspek nga immunan a natiliw.
