LAOAG CITY – Saan a nagbalin a tubeng ti rangkap iti bagi tapno agturpos ni Ms. Johanna Patricio iti Brgy. Cadaratan iti ili ti Bacarra kas Cum Laude iti kurso a Bachelor of Secondary Education Major in English iti Mariano Marcos State University.
Kuna ni Patricio, kas maysa nga agsagsagaba ti osteogenesis imperfecta wenno sakit iti tulang sipud naiyanak ket saan a pulos a nagsardeng iti panagbasa.
Inbatad na a daytoy ti ad-adda a nagbalin nga inspirasyon kenkuana tapno magun-od na dagiti arapa-ap na.
Mainaig iti daytoy, kuna ni Patricio nga ado dagiti nagbalin a karit ken limitasyon iti panagbasa na kas iti pandemiya gubuay ti covid-19.
Nu pay kasta, inbunannag na a nalasatan na amin dagitoy babaen iti tulong ti pamilya ken papagayam na nga arig nga isu ti nagserbi a saka na.
Kuna na a daytoy ket karaman iti kanayun a panangbayabay dagiti nagbalin a propesor na iti pagadalan.
Kabayatanna, inbatad ni Patricio a nagasat iti panagadal na iti kolehiyo gapu ta malaksid a naaddaan kadagiti ka-klase a tumultulong kenkuana ket maysa pay daytoy kadagiti nakapadas iti libre a tuition fee iti unibersidad.
Inbunannag na a dakkel a tulong daytoy kenkuana ken ad-adda a nangpalag-an iti panagadal na.
Immuna iti daytoy, kuna ni Patricio a ti kangrunaan a pagkakamangan na kadagiti amin a ballaigi ken pagdaldalanan na iti biyag ket iti Diyos.
Patien na a babaen iti panagtalek iti namarsua ket awan ti saan a magun-od wenno malasatan.
Plano met ni Patricio a mangisuro ditoy probinsya apaman a makapasa iti Board Licensure Examination for Professional Teachers ken sumrek iti Law School.
Maipalagip a naiyuswat ti Commencement Exercises ti MMSU idi Hulyo 15 ken umabot iti 2, 424 dagiti nagturpos para iti Class 2022.
Ni Patricio ket karaman kadagiti 507 nga estudyante nga adda iti listaan ti Latin Honors.
