LAOAG CITY – Inbatad ni Sang Panlungsod member Kichel Pungtilan a naaprubaranen iti maikatlo ken maudi a pannakaibasa ti maysa a gakat para iti ad-adda pay a pannakaipalawa ti PWD Social Pension programa ti gobierno lokal iti ciudad ti Batac.
Inlawlawag ni Pungtilan nga addan ti agdama nga ordinansa iti ciudad para iti panag-pension dagiti indigent a Persons with Disabilities iti ciudad ti Batac a dagitoy ket agtawen ti zero agingga iti 59 no sadinno a dagiti makadanun iti tawen na a 60 ket maikkat dan iti nasao a programa.
Nupay kasta, kuna na a babaen ti naipasa a gakat para iti pannakaipalawa ti PWD Social Pension programa ket agtalinaed nga agpension dagiti indigent nga adda rangkap ti bagina uray madanun da ti tawen nga 60.
Malaksid kadagiti Persons with Disabilities iti ciudad ti Batac ket mangipapaay pay ti pension ti gobierno lokal kadagiti agtawen ti 60 agpangato, malaksid ti ipapaay ti gobierno national babaen ti Department of Social Welfare and Development.
Innayon na nga iti kada dua a tawen ket ma-assess dagiti benepisyaryo tapno makita no adda ti nagbaliwan ti panagbiag ken salun-at da, ken matingiting no kwalipikado da latta para iti nasao a programa.
