LAOAG CITY – Inbatad ni Major Ericson Bulosan, ti pannakangiwat ti Northern Luzon Command nga agtultuloy ti panagkapoy ti pwersa ti CPP-NPA iti intero a pagilyan.
Daytoy ket gapu ta nakaad-adon dagiti rebelde a sumuksuko iti gobierno.
Inbatad na a resulta daytoy dagiti napipintas a programa nga ididiaya ti gobierno para kadagiti rebelde a kayat nan ti agbiag a normal.
Nupay kasta, kuna ni Bulosan a no maburibor ti ayan a lugar dagiti rebelde ket maaddaan da ti expansion area wenno mapan da kadagiti kaparanget a lugar tapno allukuyen dagiti residente a makikappeng kadakuada.
Inlawlawag na nga amin a lugar, pakairamanan ditoy Ilocos Norte ket possible a serken dagiti rebelde nga NPA tapno allukuyen da dagiti residente a tumipon kadakuada kangrunaan na dagiti agtutubo isut gapuna a masapol nga agridam ken agalerto.
Inpakaammo na nga ado dagiti wagas ti panagrecruit dagiti rebelde gapu ta uray dagiti fraternity ken sorority ket serken da tapno allukuyen dagiti miembro a makikappeng kadakuada.
Segun kenkuana, basar iti monitor da iti Region 1 ken 2, adda ti uppat agingga iti lima nga Unit ti CPP-NPA ngem bassit dagitoyen a grupo gapu ta saan dan a malapdan ti isusuko dagiti dadduma a kakadwa da.
Mainaig iti daytoy, kinumpirmaran ni Bulosan a naestablisar dan dagiti pagilyan a paggapgapwan ti dakkel a pondo dagiti rebelde a maipadalan kadagiti front organization nga isu pay ti usaren da a pagrecruit babaen ti panangipaay da ti dakkel a gatad kadagiti maseknan.
Inpasingked ni Bulosan a daytoy ti naiget a tututukan da iti agdama tapno maputeden ti maipatpatulod a pondo para kadagiti rebelde a grupo.
Innayon na a saan laeng dagiti nagduduma a pagilyan ti mangponpondo kadagiti rebelde no di ket adda pay dagiti politiko, nababaknang a negosyante, organisasyon ken dadduma pay.
Immunan nga inrakurak ti PNP nga adda ti dua nga ili ditoy probinsya a target a serken dagiti rebelde tapno agrecruit kadagiti mayat a makikappeng kadakuada kangrunaan na dagiti agtutubo.
