LAOAG CITY – Dakkel ti posibilidad na a ti panangisardeng ti United Kingdom nga aglako ti armas iti Israel ket mangpapigsa ti pwersa ti Hamas.
Daytoy ti pammati ni United Kingdom Foreign Secretary Lord Cameron kalpasan nga inrakurak ti Estados Unidos a plano a ti saanen nga aglako ti armas iti Israel.
Inlawlawag ni Cameron a saan da a suportaran ti major ground offensive ti Israel iti ciudad ti Rafah, ngem saan da met a tuladen ti plano ti Estados Unidos.
Inpakaammo na a isupsuplay laeng ti United Kingdom nga armas iti Israel ket maysa a porsiento ken nagballaag a masapol a mangbiruk pay ti ad-ado a wagas ti nadakamat a pagilyan tapno maprotehiran dagiti sibilyan ken ipalubos da ti pannakaiserrek ti humanitarian aid.
Immunan a nagballaag ni US President Joe Biden nga isardeng da ti agsuplay ti armas iti Israel no agaramid ti pagilian ti bukodna a desisyon para iti ciudad ti Rafah.
Nupay kasta, insungbat ni Israeli Prime Minister Benjamin Netanyahu a kabaelan ti pagilyan da ti tumakder a bukbukod da.
Mainaig iti daytoy, inbatad ti United Nations nga umaboten iti nasurok a 80 ribo a tattao ti nagbakwit manipod iti Rafah sipud laeng iti napalabas a lawas gapu iti mapaspasamak a riribok iti lugar.
