LAOAG CITY – Agay-ayam ni slotman Quentin Millora-Brown para iti Gilas Pilipinas iti second window ti FIBA World Cup Asian Qualifiers a maisayangkat inton Pebrero 26 iti Mall of Asia Arena idiay Pasay City.
Mismo a ti Samahang Basketbol ng Pilipinas (SBP) ti nangkumpirmar ti napintas a damag kalpasan ti pannakisarita iti kampo ni Millora-Brown.
Gapu iti daytoy, manamnama nga insigida a dumalan iti panagsanay ni Millora-Brown tapno alisto a makasubli ti sistema ti Gilas Pilipinas.
Dakkel a tulong ni Millora-Brown nangruna ket saan nga agay-ayam ni Kai Sotto nga agdama nga adda idiay Japan kaduana ti Koshigaya Alphas.
Daytoy ti maikadua a gundaway nga agay-ayam ni Millora-Brown a nakasuot ti Gilas Pilipinas jersey.
