Nakairekord ti Quezon City ti sumurok 200 a baro a kaso ti influenza-like illness iti las-od ti uppat a lawas manipud Setiembre 12 agingga Oktubre 10 ni sadinno nakapasar dagiti pasiente ti common flu symptoms kas ti panaguyek, panateng ken gurigor.
Basar iti Quezon City Epidemiology and Surveillance Division a ti kabaroan a bilang ket limmabes iti 195 a kaso a nairekord idi Agosto, a nagitunda iti pakabuklan nga 1,578 a kaso iti 2026.
Naamoan a kaadoan kadagiti naireport a kaso ket pakaseknan dagiti ubbing nga agtawen ti 14 agpababa, ken ti kangatoan a bilang ti nairekord ket iti 11 a barangay kas ti UP campus, Batasan Hills, ken Doña Aurora.
Mainaig iti daytoy, nagballaag ti Department of Health iti publiko nga iti influenza-like illness ket agwaras babaen ti respiratory droplets manipud iti infected nga individual ken ti contact iti agong, ngiwat wenno mata, wenno iti contaminated objects iti pasiente.
Inpakaammoda a dagiti infected nga indibidual ket kakaroan a makaakar iti umuna nga tallo agingga uppat nga aldaw ti sakit, uray pay no awan makita a sintomas.
Gapu iti daytoy, binalakadan ti ahensia ti publiko nga agtalinaed ti pagtaengan, liklikan ti panagsalamuha iti sabali a tao, liklikan ti contact kadagiti high-risk individuals pakairamanan dagiti senior citizen, dagiti adda diabetes wenno asthma, masikog a babbai ken ubbing nga agtawen ti tallo agpababa, uminom ti agas no agurigor, aginana, uminom ti 8 agingga 10 a baso ti danum inaldaw ken mangan ti nasalun-at a taraon.
