LAOAG CITY – Inrakurak ti Bise Mayor ditoy siudad ti Laoag a kinasaritana dagiti kameng ti Sangguniang Panlungsod mainaig iti umas-asideg a panangrugi ti local campaign period inton Marso 28.
Inbatadna nga inkiddawna a laglagipen ken takderanda ti obligasion dagitoy.
Inlawlawagna a no saan da nga agatendar kadagiti maisayangkat a regular session ket awan ti maiyuswat a session.
Mainaig iti daytoy, inpakaammo ti Presiding Officer ti Sangguniang Panlungsod a kastoy ti mapasamak ket awan ti maaprobaran a resolusion wenno ordinansa isu nga awan met ti ipatungpal ti executive body.
Mangnamnama daytoy nga iti baet a makumikomdanton ti panagkampania ket saanda a liplipatan ti agatendar ti regular session.
Kabayatanna, adda ti singasing dagiti sumagmamano a kameng ti konseho ti saan a panagusar ti barong ken ipalubos ti casual wear kabayatan ti campaign period ngem saan nga inamungan ti komite.
Naammoan a ti kalikagum ti dadduma ket no agappuda ti kampania ket dumiretso dagitoy iti session hall a saanen nga agsuot ti barong kasta met no malpas ti session ket dumiretsoda iti kampania.
Nupay kasta, kunana a saan nga umanamong iti daytoy ken napagdesisionanna a pagtalinaeden ti panagisuot ti barong kas panangapikta ti respeto iti session.
