LAOAG CITY – Natay ti maysa a radio anchor kalpasan a pinaltugan ti saan pay a nabigbig nga armado a lalaki kabayatan ti live broadcast na iti mismo a pagtaengan na iti Calamba, Misamis Occidental itay bigat.
Nabigbig ti biktima a ni Juan Jumalon wenno “Johnny Walker”, agtawen ti 57.
Basar iti report, kabayatan ti live program ti biktima iti 94.7 Calamba Gold FM iti mismo nga home-based radio station na iti Barangay Don Bernardo A. Neri ket simrek ti suspek ken bigla na lattan a pinaltugan daytoy.
Makita pay iti video a sakbay a pimmanaw ti suspek ket innala na ti kwentas ti biktima.
Iti inisyal nga impormasyon manipod iti Camp Crame, naitaray ni Jumalon iti Calamba District Hospital ngem pimmusay metlaeng gapu iti nakana a sinagaba na a sugat iti rupa na. Manarimaan ti panangiyus-uswat ti imbestigasyon dagiti otoridad tapno mabigbig t kinatao ti suspek ken maamoan ti motibo iti krimen.
