LAOAG CITY – Naisayangkat ti drug buy-bust operation iti paset ti Barangay 6 ditoy ciudad ti Laoag.
Nabigbig dagiti subject ti operasyon a da Mr. Aries Castro y Corpuz, radio operator iti Laoag City Hall, taga Barangay 27 ditoy ciudad ti Laoag ken ti pagayam na a ni Ruffner Ocampo y Bonoan, agtawen ti 37, residente met iti Brgy. 14 ditoy ciudad.
Iti palawag ni Castro, inawis ni Ocampo tapno mapanda alaen ti lechon baboy, ngem sakbay a rimuar da ket kinasarita na ti pagayam na a masapol a mabiit da laeng.
Nupay kasta, nasdaaw ni Castro gapu ta awan ti lechon baboy a naala da, imbes ket inbaga manen ni Ocampo nga adda ti kakinnita na a babai.
Idi nakadanun dagiti maseknan iti paset ti Barangay 6 a nakalugan ti Fortuner ket bigla a nagpalikud ni Ocampo kalpasan a naibaga na nga ipaigid na ti lugan gapu ta nakita nan ti babai.
Ditoy metten a maipagarop nga adda dagiti nangsada kadakuada kageddan ti panangpaturongda ti paltog ken ni Castro rasaon a kellaat nga insardeng na ti lugan.
Naamoan a ti target dagiti otoridad iti insayangkat da nga operasyon ket ni Ocampo.
Kabayatanna, inadmitir ni Ocampo a saan da nga aglako no di ket gumatang iti shabu iti maysa a babai.
Malaksid ti maysa a sachet a naglaon ti maipagarop a shabu nga inlako ni Ocampo ket nakakumpiskar pay dagiti otoridad ti dua a sachet a naglaon ti maipagarop a shabu, sangaribo a pisos a nausar iti operasyon, foil, kartib, ken lighter.
