LAOAG CITY – Itultuloy ti Rain or Shine iti maikapat iti pagarangkadada idinto a gagem ti San Miguel ti maikatlo nga agsasaruno a panangabak iti Season 49 PBA Commissioner’s Cup.
Makalaban ti Elasto Painters ti Terrafirma Dyip ita a malem idinto nga agbinnalubal ti Beermen kontra iti guest team nga Eastern inton rabii iti Philsports Arena idiay Pasig City.
Kalpasan ti pannakapaay ti Meralco (3-1) ket nagsasaruno nga inabak ti Rain or Shine (3-1) ti Eastern (5-2), San Miguel (3-2) ken Magnolia (2-4) ken ti kankanayonda a maabak a Terrafirma (0-6).
Nupay kasta, saan a kayat nga agpakampante ni Elasto Painters’ coach Yeng Guiao iti kabaelan ti Dyip a kigtoten isuda.
