LAOAG CITY – Naagaw ti Rain or Shine Elasto Painters manipud iti San Miguel Beermen ti panangidaulo iti puesto ti Group B ti PBA Governor’s Cup.
Daytoy ket kalpasan nga abaken ti Rain or Shine ti Beermen iti iskor a 122-112 iti ay-ayam a naiyuswat iti Ninoy Aquino Stadium idiay Manila.
Adda ti pito a panangabak ken dua a pannakaabak ti Painters idinto ti Beermen ket addaan ti innem a panangabak ken tallo a pannakaabak.
Bimmida iti panangabak ti Rain or Shine ni Andrei Caracut a nakairekord ti 20 points, walo nga assists ken tallo a rebounds idinto nga addaan ti 16 points, lima nga assists, uppat a rebounds ken maysa a block ni Beau Belga ken ti import a ni Aaron Fuller ke addaan ti 17 points, 11 rebounds, uppat nga assists ken dua a blocks.
Iti biang ti Beermen ket addaan ti 27 points ni CJ Perez ken 24 points met ni Terrence Romeo idinto a nasayang met ti inaramid a 14 points, 12 rebounds, dua nga assists ni June Mar Fajardo ken 24 points ni import Jordan Adams.
