LAOAG CITY – Nangabak ti Rain or Shine Elasto Painters kontra iti defending champion a San Miguel Beermen iti iskor a 107-93 iti agtultuloy a PBA 49th Season Commissioner’s Cup a naiyuswat iti Filoil EcoOli Center idiay San Juan City.
Immarangkada ti Elasto Painters 12-0 iti katengngaan ti last quarter tapno magun-od ti maikadua a nagsaruno a panagballigi.
Inbatad ni Rain or Shine coach Yeng Guiao, pudno a pinilitna dagiti umaayamna a labanan ti kinapaspas ti Beermen tapno isuda ket mangabak.
Indauloan iti panagballigi ti Painters ti import a ni Deon Thompson a nakaaramid ti 18 points idinto nga addaan ti 15 points, uppat a rebounds, lima nga assists ken uppat nga steals ni Adrian Nocum.
Ninayonan ti 14 points ni Caelan Tiongson ken sag-12 points da Felix Lemetti ken Keith Datu.
Nasayang met ti inaramid a 20 points ken 10 rebounds ni June Mar Fajardo ken 16 points ni Juami Tiongson para iti Beermen.
