LAOAG CITY – Saan nga anamungan dagiti botante a nalinteg ti panunut na, ti nagbalin a rakurak ti maysa a mabigbig nga artista a nangikampanya kenni Bise Presiente Leni Robredo seknan iti panagbalin a pagayam ti kumunista a grupo ken isunto laeng ti presidente a patyen ti NPA.
Segun kenni Professor Herdy Yumul, sociologist iti Mariano Marcos State University (MMSU) ken maysa a political analyst, nalidem a pumudno ti nasao a rakurak ti mabigbig nga artista a ni Mega Star Sharon Cuneta.
Kuna na a naiget ti kampanya ti gobyerno kontra iti insurhensiya ken babaen iti daytoy ket kimmapsoten ti pwersa ti NPA.
Inbatad ni Yumul a mabalin met a suportaran ti gobyerno ti peace negotiation ngem saan a rumbeng a lumukay ti kampanya ti gobyerno.
Inbunannag na nga iti baet a nalidem a mapasamak daytoy ket makuna laeng a makaala ti ad-ado a botos ni Robredo.
Kuna ni Yumul nga agproblema laeng ti tao no daytoy ti sumukat a presidente ken saan a nalawag dagiti programa na kontra iti NPA.
Innayon na nga aglalaok ti support base ni robredo ken no bilang maelektaran kas presidente ket arig puppet ti sumaruno a presidente ti pagilian.
Maipalagip nga inbatad ni Presidente Rodrigo Duterte iti maysa kadagiti talk to the people a programa na iti telebisyon a possible a suportaran na ti presidential candidate a saanen a makinegosiar iti kumunista a grupo kas iti CPP-NPA. Kuna na nga adun a soldado ken pulis ti napapatay dagiti rebelde a grupo rason a saanen a rumbeng a maaddaan ti peacetalks iti nagbaetan ti gobyerno ken ti CPP-NPA.
