LAOAG CITY – Inbatad ni Atty. Rey Gorgonio a mabalin nga abuswen ti Philippine National Police (PNP) ti nagbalin a rakurak ni Presidente Rodrigo Duterte a mabalin ti agawat ti regalo dagiti pulis.
Kuna na a kas ti naibaga ni Commisioner Aileen Lizada iti Civil Service Commissioner (CSC) a ti panagawat dagiti pulis ti regalo ket mailabsing iti paglinegan.
Inlawlawag na a mabalin a gapu ti nagbalin a rakurak ti presidente ket abuswen dagiti kameng ti pulisya ket saan dan nga aramiden ti trabaho da no awan ti bayad wenno regalo a maited kadakuada.
Inpetteng na a ti nagbalin a rakurak ni Duterte ket senyales nga agraira pay laeng ti korapsyon iti gobierno.
Innayon ni Gorgonio a saanden a kasapulan dagiti pulis ti regalo tapno annungen da ti trabaho da gapu ta nangato ti sweldo da.
Kabayatanna, kuna ni Gorgonio a ti nagbalin a rakurak ni Presidente Duterte ket maysa a ground tapno mapilaan ti impeachment.
