LAOAG CITY – Nagballaag ni International Criminal Court Assistant to Counsel Atty. Kristina Conti a mabalin a makaapektar iti posibilidad a pannakawayawaya ni dati a Presidente Rodrigo Duterte ti nagbalin a rakurak ni Senate President Alan Peter Cayetano a mangikalkalintegan iti war on drugs ti dati nga administrasyon.
Segun ken ni Conti, ipakpakita ti rakurak ni Cayetano a nagtalinaed a napigsa ti impluwensiya ken koneksiyon ni Duterte iti Pilipinas, banag a mabalin a pakaalarmaan ti International Criminal Court (ICC).
Kuna pay ni Conti a possible a panunuten ti ICC nga adda dagiti tattao a nakasagana a tumulong ken ni Duterte no makasubli ditoy Pilipinas, isut gapuna a possible nga agbalin a rason daytoy tapno saan a palubusan a mawayawayaan ti dati a presidente kabayatan ti agtultuloy nga imbestigasyon.
