LAOAG CITY – Manamnama a maillipas iti uneg ti dua a bulan ti kalsada ken rangtay iti paset ti Barangay Pila, ditoy ciudad ti Laoag nga agturong iti Barangay Dibua ken Caoacan.
Segun ken ni Engr. Romeo Bartolome, Chief construction section 1st District Department of Public Works and Highways (DPWH), napaattidog ti kontruksyon gapu ta saan laeng a ti transition slab ti materimaan, no di ket pakairamananen ti embankment protection.
Inlawlawagna a ti materimaan laeng kuma ket ti transition slab saan a pakairamanan ti embankment protection na gapu ta nasayaat pay laeng daytoy.
Ngem bayat ti konstruksyon ket ditoy a nabaliwan ti plano gapu ta apaman nga agtub-tub da ket nakitada nga agbibitin ti semento iti embankment protection.
Kunana a nasayaat ta nakita nga insigida daytoy gapu ta no saan ket addada dadakkel a lugan a lumasat ket saanna a kabaelan.
Kabayatanna, naammuan a naperdi ti nasao a kalsada gapu pay laeng ti iduduprak ti Bagyo Egay.
Agdagup met iti 4.8 million pesos ti pundo ti kontruksyon ti rangtay, no sadinno a ti pundo ket saan pay a karaman ditoy ti magastos iti kontruksyon iti embankment protection.
Iti agdama ket mannarimaan ti kontruksyon iti nasao a rangtay ken manamnama a mailippas iti kabiitan a panawen.
