LAOAG CITY – Temporaryo a nagaburan ti daga ti nakarakaran iti paset ti rangtay iti Brgy. 17 iti ili ti San Nicolas.
Segun kenni Barangay Chairman Rosendo Nicolas, temporaryo a sinerraan da ti rangtay gapu ti panagamak da nga ad-adda a madadael daytoy.
Basar kadagiti ladawan a naipatulod iti Bombo Radyo, nakarakaran ti akin igid a paset iti sirok ti rangtay rason a narisgu a pagdalanan dagiti motorista.
Kuna ni Nicolas nga adda latta dagiti aglibas a dumalyasat iti rangtay.
Kabayatanna, natratar daytoy iti lokal a gobyerno iti nasao nga ili ken namnamaen ti kapitan a mairaman ti pondo na para ti pannakatarimaan ti rangtay iti 2022 budget ti ili.
Maipalagip a nakarakaran ti akin igid a sirok ti rangtay gapu ti nakaro a panagayus ti danum iti waig gubuay ti panagtudtudo iti nasao nga ili.
