LAOAG CITY – Saan a mailadawan ni Ms. Dee Vanna Espiritu Galacgac a residente ti Brgy. Valbuena iti ili ti Pinili ti napalaos a ragsakna kalpasan a nakagun-od ti 88.25% rating ken Rank 1 iti kalepleppas a 2024 Food Technologist Licensure Examination.
Segun kenkuana, nakigtot daytoy idi naammoanna ti resulta ti eksaminasion gapu ta saan laeng a nakapasa no di ket isuna pay ti nangidaulo iti nasao a board examination.
Inbatadna a saanna a ninamnama ti nagbalin a resulta gapu ta apaman a nalpas ti eksaminasionda ket inpagarupna a bagsak daytoyen.
Kunana nga idi agawid daytoyen iti pagtaenganda ket nagpupok iti kuartona ken saanen a rimrimmuar iti pagtaenganda gapu iti pannakapukaw ti kumpiansana.
Mainaig iti daytoy, inpakaammo ni Galacgac nga adda dagiti inpegpegketna nga sticky notes kadagiti amin a suli iti pagtaenganda tapno ad-adda a maikabesana dagiti ad-adalenna.
Innayonna nga awan pay ti planona nga agtrabaho iti ballasiw taaw gapu ta kalikagumna nga agtrabaho pay laeng ditoy pagilian.
Naammoan a ni Galacgac ket nagturpos kas magna cum laude idi 2023 iti kurso a Bachelor of Science major in Food Technology iti Mariano Marcos State University ken iskolar ti Department of Science and Technology (DOST).
Kabayatanna, manipud iti 995 a nageksamen ket 510 dagiti nakapasa wenno kaibatugan ti 51.26 a porsiento.
