LAOAG CITY – Maragsakan ken saan a ninamnama ni Ms. Patricia Dennisse Balico a nagun-od na iti maika-9 a puesto iti September 2024 Licensure Examination for Teachers (Secondary level) ken nakagun-od ti 92.80% rating iti nadakamat nga eksaminasion.
Segun kenkuana, naammoanna laeng ti resulta bayat nga adda iti pagtrabahaonna, babaen kadagiti pada na a tutor.
Kinunana nga adu ti inaramidna a panagsakripisio ken ado dagiti nagbalin a karit tapno maragpatna ti balligi, kas iti self-doubt, pressure, ken karit iti time constraint.
Inbatadna a nag-enroll daytoy babaen iti Carl Balita Review Center ditoy siudad ti Laoag, idinto a nagtiponan iti on-site ken online review sessions.
Mainaig iti daytoy, nangrugi ti arapaapna nga agbalin a mannursuro idi nainspirar isuna ti naamammona a maestro iti Senior High School.
Inbinglay ni Balico a kaay-ayona ti makipaspaset kadagiti Science Quiz Bees ken ti kuma alaenna a course ket law.
Innayonna nga adda dagiti pammati iti sinurot na kas iti nagpatahar daytoy iti maysa a topnotcher ken kinugtaranna ti nagtugawanna sakbay a timmalaw iti testing center.
Kabayatanna, nagyaman daytoy kadagiti amin a nagbalin a paset ti balligina, manipud kadgiti nangidaulo iti review center agingga kadagiti nangsuporta kenkuana.
Iti agdama, plano ni Balico nga ituloy ti panagadalna ken mangala iti master’s degree ken silulukat met daytoy iti aniaman nga oportunidad.
