LAOAG CITY – Nagballigi iti nagtitipon a pwersa iti Ilocos Norte Police Provincial Office (INPPO) ken NCRPO a nangtiliw ti Top 7 most wanted person iti listaan ti Provincial Anti-Partisan Armed Group and Dangerous Drug Council wenno PAPAGDDC ditoy probinsya nga Ilocos Norte.
Segun ken ni Provincial Director Police Col. Cesar Pasiwen, ti suspek a ni alyas Totoy ket tiniliw dagiti otoridad idiay Las Piñas, Manila kalpasan iti 15 a tawen a panaglemlemmeng na.
Naamoan a ti suspek ket sumangsango iti innem a counts ti kaso a rape ken nagbalin a biktima na ket kasinsin na idiay Brgy. Balaoi, Pagudpud, Ilocos Norte.
Segun ti report, napasamak ti krimen idi 2004 nga agtawen laeng idi ti biktima iti 13 idinto a ti suspek ket agtawen met iti 19.
Iti agdama, ti suspek ket agtawenen iti 33 idinto a ti biktima ket agtawen iti 28.
Basar iti imbestigasyon, kalpasan ti krimen ket napan naglemmeng idiay Las Piñas ti suspek ken nagtrabaho kas backhoe operator idinto a ti nagbalin a biktima na ket nagsikog gapu ti maipagarop a panangrames na iti namin-innem a daras.
Inkalintegan ti suspek iti pannakisarsarita kenkuana iti Bombo Radyo a saanna a rinames ti biktima no di ket naaddaan da ti relasyon.
Nupay kasta, kinontra daytoy dagiti nagannak da gapu ta agkasinsin da.
Kabayatanna, maipaima met iti INPPO ti naidiaya idi a 90 a ribo a pisos a gunguna para iti siasinno man a makaitudo ti ayan ti nasao a suspek.
