LAOAG CITY – Kinumpirmaran ni Mr. Mark Abad, ti officer in charge iti City Agriculture Office iti siudad ti Batac a nangato ti presyo ti abono partikular iti Urea.
Daytoy ket gapu ta manipod iti nasurok 1,000 a pisos a bayad iti kada sako ti urea iti kallabes ket agay-ayamen iti 2,600-2,700 a pisos ti presyo daytoy.
Segun ken ni Abad, ti panagngato ti presyo ti abono ket gubuay iti panangiprayoridad dagiti pagilian a paggapoan ti raw materials a masuplayan nga umuna ti bukodda a lugar sakbay iti sabali a nasyon rason a limitado ti suplay.
Kabayatanna, kuna ni Abad nga iti baet daytoy ket agtultuloy ti panangtulong ti lokal a gobierno iti siudad ti Batac para kadagiti mannalon.
Maipalagip nga iti naglabas a sesyon iti konseho iti siudad ti Batac, nanayunan ti 13 milyon a pisos ti pondo para iti pannakagatang ti ganagan dagiti mannalon.
