LAOAG CITY – Ad-adda a papigsaen dagiti pagadalan ditoy ciudad ti Laoag ti reading proficiency dagiti agad-adal.
Daytoy ket gapo iti kalikagum da a mangikonektar kadagiti pagkurangan iti panagadal ken mangipaay iti suporta kadagiti marigrigat nga agad-adal.
Babaen kadaytoy a kalikagum, ket nangirugi dagiti pagadalan ditoy ciudad ti Laoag kadagiti bukod da a reading programs, tapno masolusyanan dagiti parikut a mainaig iti panagbasa kadagiti agad-adal.
Babaen ti Curriculum Implementation Division (CID) ti Department of Education-Schools Division of Laoag City (DepEd-SDLC), aktibo a maipatungpal dagitoy a school-based reading initiatives babaen ti tulong dagiti school heads, teachers, barangay officials ken dadduma pay a community stakeholders.
Napaliiw ti schools division ti dakkel a panagdur-as bayat ti monitoring activities a naisayangkat kadagiti pagadalan sipud idi naipatungpal daytoy.
Iti agdama, adda iti 91% a Grade 1 students ti simmayaat ti panagbasa da, 86% ti simmayaat iti Grade 2, ken 90% para kadagiti agad-adal iti Grade 3.
Naamoan a ti datos ket naibasar iti monitoring a naisayangkat kadagiti 21 a pagadalan ditoy ciudad.
Sinigurado dagiti pagadalan nga amin a marigrigat nga agad-adal ket agbalin nga individually literate, kalpasan ti agsasaruno nga interventions ken materials a naited para kadakuada, partikular para iti Grade 1 agingga 3.
Dagiti nasao a school-based program, ket naibase iti “Bawat Bata Bumabasa” ti DEPED, wenno ti maaw-awagan a 3Bs initiative, kas nailanad iti DEPED Memorandum No. 173 s. 2019, ken ti Reading First para iti Region I Program kas nailanad iti Regional Memorandum No. 609 s. 2021.
Gapu iti panagballigi ti nasao a programa, plano ti schools division a i-sustain ken paigiten dagiti aktibidad tapno maikonekta dagiti gap kadagiti parikut iti panagbasa, espesipiko a mangipaay iti ad-adu a tulong para kadagiti mangisuro, tapno ad-adda a makabaelda iti panangtulong kadagiti estudiante.
