LAOAG CITY – Dumanon iti nakurkurang ngem 200 dagiti benepisiario iti kaunaan a Review and Examination Assistance Program wenno REAP nga inpaay ti Provincial Government of Ilocos Norte kadagiti nagaplikar iti “licensure examination.”
Segun ken ni Mr. Willie Jake Sib-at, Officer In-charge ti Provincial Education Office ken agdama nga Ilocos Norte Youth Development Officer, kangrunaan a nagbasaran iti pannakapili dagiti kualipikado ket ti mapaspastrek ti pamilia dagiti aplikante.
Inlawlawagna a kaaddoan kadagiti kualipikado iti nasao a programa ti probinsia dagiti dati nga iskolar ti probinsia kangrunaanna kadagiti nagturpos iti teacher education.
Segun kenkuana, 197 dagiti nagbalin a kualipikado iti nasao a programa.
Kunana nga immawat ti tunggal maysa ti uppat a ribu a pisos a pangtulong kadakuada para iti review sakbay iti licensure examination.
