LAOAG CITY – Kalikagum Ms. Kara Leah Villa, Bombo International News pendentondent idiay Dubai, United Arab of Emirates a maduktalan ti pakabigbigan ti adda iti likudan ti dummy account a mangperperdi kenkuana.
Inlawlawagna a saanna a kayat a palabsen ti napasamak kenkuana a maperperdi ti imahena kas maysa a recruiter kadagiti Overseas Filipino Worker a kalikagumda nga agtrabaho iti ballasiw-taaw.
Kunana a naruayen dagiti natulunganna nga Overseas Filipino Worker sipod idi tawen 2015 ken awan met ti nagbalin a problemada kenkuana.
Gapu iti daytoy, gagem ni Villa a maammoan no asino ti agus-usar iti nasao a dummy account tapno agsardengen ti palso nga impormasion nga agwarwaras iti online a maipagarup nga isuna ket maysa nga scammer.
Innayonna a basar iti impormasion kenkuana ket taga Cavite wenno Zamboanga ti mangus-usar ti dummy account.
Kabayatanna, naammoan a dagiti Overseas Filipino Worker a natulungannan ket nagbalin a nasayaat ti kasasaadda idiay Qatar, Saudi Arabia ken Kuwait.
