LAOAG CITY – Naarestar ti maysa a lalaki iti drug buybust operation nga inyuswat ti PNP-Batac ken Provincial Drug Enforcement Unit (PDEU).
Nabigbig daytoy a ni Hywel Albano y Agbayani, residente iti Brgy. 7, Caunayan iti ciudad ti Batac.
Segun kenni Police Chief Master Sergeant Harold Nicolas iti PDEU, naiyuswat ti transaksyon iti Barangay 10-S, Barani iti met laeng nasao a ciudad ngem idi naiyawat na ti maipagarop a droga iti nagpammarang a police pusuer buyer ket timmaray gapo ta nadlaw na a pulis ti kinatransaksyon na.
Kalpasan ti sumagmamano a minutos a panangiyuswat da ti hot pursuit operation ket natiliw met laeng dagiti pulis ti suspek iti pagtaengan na iti Barangay Caunayan iti nasao a ciudad.
Nakumpiskar dagiti otoridad iti ikot ni Albano ti 13 a sachet a naglaon ti maipagarop a shabu ken maysa a sachet a nausar iti transaksyon ken sangaribo a pisos a buybust money, ken ti balor amin dagitoy ket 16,800 a pisos.
Naamoan a ni Albano ket repeat offender seknan met laeng iti droga ken Regional High Value personality iti Region 1, ken daytoy ket naka-probation.
Innayon ni Nicolas a ni Albano ket adda ti pakainaigan na kadagiti immun-unan a natiliw seknan met laeng iti iligal a droga.
Kabayatanna, nagkedked met a mangipaay ti komento ni Albano seknan iti pannakatiliw na.
